Rueda inaugura en Abegondo un centro de saúde de máis de 4 millóns que abrirá o luns
O presidente da Xunta, Alfonso Rueda, inaugurou este xoves en Abegondo o novo centro de saúde, unha infraestrutura que abrirá as súas portas aos usuarios o vindeiro luns 22 de xuño e que supón un importante salto na atención sanitaria do municipio.
O edificio contou cun investimento superior aos 4 millóns de euros e substitúe o antigo consultorio, no que se prestaba servizo desde hai 35 anos. A Xunta asumiu a construción e o equipamento do centro, cunha achega de 3,2 millóns, mentres que o Concello colaborou coa adquisición dos terreos e a mellora dos accesos.
Rueda destacou a importancia de contar con espazos axeitados para os profesionais e os pacientes, e puxo en valor a colaboración institucional para facer posible a obra. No acto tamén participaron o conselleiro de Sanidade, Antonio Caamaño, o presidente do Parlamento de Galicia, Miguel Ángel Santalices, e o alcalde, José Antonio Santiso.
O novo centro dispón de 1.221 metros cadrados, o dobre que o anterior, e está deseñado en planta baixa para facilitar a accesibilidade. Conta con consultas, enfermaría, pediatría, área da muller, espazos polivalentes e servizos xerais.
O edificio incorpora criterios de sustentabilidade e materiais como madeira galega, ademais de zonas pensadas para crear un ambiente máis acolledor. No exterior descubriuse unha escultura en granito, obra de Fidel Goás Méndez, en homenaxe ás persoas doantes de órganos.