Retiran os restos do antigo paseo marítimo que afloraran na Praia Nova de Sada
Os traballos para retirar os restos do antigo paseo marítimo visibles na marxe dereita da Praia Nova, xunto á desembocadura do río Maior, comezaron esta mañá en Sada. A actuación, demandada polo Concello, busca eliminar unhas estruturas pétreas que permanecían á vista e que xeraban un importante impacto visual nun dos puntos máis emblemáticos da fachada litoral sadense.
A intervención está a ser executada pola Demarcación de Costas e prolongarase durante os vindeiros días. Para facilitar o acceso da maquinaria en condicións de seguridade, será necesario realizar cortes parciais no paseo marítimo mentres duren os traballos.
Co obxectivo de minimizar o impacto ambiental da actuación, instalouse unha malla de contención na zona intermareal. Esta medida pretende evitar que o movemento de áridos e lodos provocado pola retirada dos restos poida estenderse ao resto do areal.
Os elementos que agora se van retirar corresponden á antiga balaustrada de pedra do paseo marítimo. Durante a construción do paseo actual, hai máis de dúas décadas, estes restos quedaron soterrados baixo a area neste tramo final da Praia Nova. Co paso dos anos, a acción do mar foi reducindo esa capa de area ata deixar de novo á vista parte das estruturas.
A retirada permitirá mellorar a imaxe da contorna e completar outras actuacións desenvolvidas durante a primavera no litoral sadense. Desde o Concello agradecen a comprensión da veciñanza polas molestias que poidan ocasionar os traballos e subliñan que a intervención contribuirá á mellora paisaxística e ambiental da zona.