Renfe celebra o vindeiro 7 de maio na Coruña un Foro de Experiencia Cliente
Renfe celebrará no mes de maio a terceira edición dos Foros de Experiencia Cliente en Galicia, onde viaxeiros recorrentes poderán compartir en primeira persoa apreciacións e suxestións sobre o servizo antes, durante e despois de realizar as súas viaxes. A primeira reunión terá lugar o próximo 7 de maio na Coruña e, a segunda, en Ferrol, o día 14.
Os encontros terán este ano unha nova dinámica, converténdose en ‘Foros de Experiencia Cliente in situ’, é dicir, desenvolveranse a bordo dun tren, ambientando así a contorna durante unha viaxe.
Estas reunións cos clientes permiten á compañía coñecer de forma directa apreciacións, expectativas e necesidades de diferentes viaxeiros que utilizan o tren de maneira habitual. Así, o propósito é desenvolver ideas de forma conxunta e iniciativas para implementar proxectos que melloren a experiencia de viaxe e satisfagan as expectativas da maioría dos clientes que utilizan estes servizos.
No marco do obxectivo de Renfe de continuar avanzando cara á accesibilidade universal, os Foros de Experiencia Cliente volverán ser inclusivos e, coa colaboración do Comité Español de Representantes de Persoas con Discapacidade (CERMI), contarán coa participación de usuarios con algún tipo de discapacidade.
Os clientes que desexen participar poden apuntarse ata o día 16 de abril. A inscrición hase de realizar mediante o envío dun correo electrónico a foroexperienciaclientegalicia@renfe.es. Unha vez pechado o prazo de presentación, realizarase un proceso de selección fronte notario para elixir, de forma aleatoria, aos clientes que finalmente participarán en cada un deles.