Recollen doazóns de sangue en Sada o venres 20 de decembro
A unidade móbil da Axencia de Doazón de Órganos e Sangue estará en Sada o venres 20 de decembro para facilitar ás veciñas e veciños a oportunidade de doar sangue. A unidade estará situada diante da OMIX Sada e atenderá en horario de 9:45 a 14:30 pola mañá, e de 15:45 a 21:00 pola tarde.
A doazón de sangue é un acto de solidariedade fundamental para garantir as reservas nos hospitais galegos. Cada día, en Galicia fan falta 450 doazóns para atender intervencións cirúrxicas, tratar a persoas con cancro ou leucemia, e atender emerxencias como accidentes de tráfico ou laborais.
Lembran que para doar sangue é preciso levar un documento identificativo como o DNI ou a tarxeta de doazón. Desde a Axencia destacan que o sangue non se pode fabricar, polo que a colaboración cidadá é clave para salvar vidas.
