Recollen doazóns de sangue en Betanzos o 9 e 10 de xaneiro
A unidade móbil da Axencia de Doazón de Órganos e Sangue estará en Betanzos os días 9 e 10 de xaneiro para facilitar ás veciñas e veciños a oportunidade de doar sangue. O xoves 9 estará dispoñible en horario de 10:00 a 14:00 pola mañá e de 16:00 a 21:00 pola tarde, mentres que o venres 10 atenderá de 16:00 a 21:00 horas. A unidade estará situada na praza dos Irmáns García Naveira.
A doazón de sangue é un acto de solidariedade esencial para garantir as reservas nos hospitais galegos. En Galicia son precisas arredor de 450 doazóns diarias para atender tratamentos oncolóxicos, intervencións cirúrxicas, urxencias médicas e outros casos de emerxencia.
Lembran que é necesario presentar un documento identificativo, como o DNI ou a tarxeta de doazón, para realizar a doazón. Desde a Axencia destacan a importancia da colaboración cidadá, dado que o sangue non se pode fabricar, e cada doazón pode axudar a salvar vidas.
