Reabre o pavillón de O Graxal tras o peche cautelar polo seu deterioro
O pavillón deportivo de O Graxal volveu abrir as súas portas despois do peche cautelar acordado a comezos de curso polo estado de deterioro que presentaba a instalación. Segundo informou Alternativa dos Veciños de Cambre, na xornada de onte tanto o alumnado do CEIP Graxal como as diferentes entidades deportivas puideron retomar a actividade con normalidade e en condicións de plena seguridade.
A formación lembra que no último pleno votou a favor de tramitar por vía de urxencia a licitación das obras que fixeron posible resolver esta situación, que cualifican de sobrevida por mor dunha mala xestión do anterior goberno municipal nas instalacións deportivas do municipio.
Desde Alternativa dos Veciños subliñan que o peche do pavillón afectou de maneira especial á comunidade educativa do CEIP Graxal, ao ver interrompidas as sesións de educación física, así como ás entidades e clubs que empregan o recinto para adestramentos e competicións, co conseguinte impacto nas actividades extraescolares e na oferta deportiva local.
O grupo político insiste en que continuará esixindo ao actual executivo que manteña unha planificación estable de mantemento e posta ao día das instalacións municipais, incluídos os pavillóns e os centros de ensino, co obxectivo de evitar que se repitan situacións semellantes. Alternativa dos Veciños de Cambre quere que quede constancia do seu apoio á solución desta incidencia e do seu compromiso en defensa dos servizos públicos e das infraestruturas educativas e deportivas do concello.