Rafael Alberti e a avenida dos Mallos reabren tras unha reforma de máis de 1,5 millóns de euros
A rúa Rafael Alberti e a avenida dos Mallos reabren ao tráfico tras a finalización das principais obras de humanización e reforma impulsadas polo Concello da Coruña. As dúas actuacións supuxeron un investimento conxunto de máis de 1,5 millóns de euros e forman parte do Plan de barrios 2025-2027.
Na rúa Rafael Alberti, o Concello destinou 530.000 euros a unha renovación integral executada por fases. A intervención incluíu a repavimentación da calzada, a mellora das beirarrúas, a renovación da sinalización e a reordenación de varios espazos para gañar en funcionalidade e accesibilidade.
O proxecto tamén permitiu modernizar a rede de iluminación pública coa instalación de luminarias LED de alta eficiencia enerxética. Ademais, renováronse as redes de abastecemento e saneamento, co obxectivo de mellorar os servizos urbanos da contorna.
Nesta rúa só queda pendente o remate dos traballos de xardinería, que se completarán nos vindeiros días. A actuación incorporará novos elementos vexetais nas zonas xa preparadas xunto ás beirarrúas, para reforzar a nova imaxe do espazo.
A outra gran intervención corresponde á avenida dos Mallos, onde o investimento municipal superou o millón de euros. A obra incluíu a renovación de beirarrúas e calzada, a mellora das canalizacións municipais, actuacións nas redes de saneamento e pluviais, nova iluminación, semáforos, sumidoiros e conexións de baixantes dos edificios.
A reforma da avenida dos Mallos completouse tamén coa colocación de mobiliario urbano, sinalización e plantación de árbores. O Concello destaca que esta actuación dá resposta a unha demanda histórica do barrio, ao tratarse dunha das principais arterias da cidade.
A concelleira de Infraestruturas e Mobilidade, Noemí Díaz, sinalou que estas obras responden ao compromiso municipal de mellorar a vida nos barrios a través dunha planificación urbana máis accesible, moderna e pensada para a cidadanía.