'Quéroche un conto' chega o venres a Arteixo cunha proposta teatral para todos os públicos
O Auditorio do Centro Cívico Cultural (CCC) Manuel Murguía de Arteixo acollerá o venres 13 de decembro, ás 20:30 h, a obra Quéroche un conto, da compañía Alexandre Bóveda Teatro. Este espectáculo combina narración oral e teatro, e está dirixido a todos os públicos a partir dos 12 anos. Cunha duración de 50 minutos, promete transportar ao público a un universo de historias únicas e emocionantes.
A trama desenvólvese nunha taberna típica dunha vila galega, onde diferentes personaxes aparecen ao longo do día, compartindo historias. Estas historias, en ocasións vividas polos propios protagonistas e noutras escoitadas ou lidas, amosan retazos de vida que conectan coa tradición galega e coa experiencia humana universal.
O espectáculo conta coa autoría do grupo Alexandre Bóveda Teatro e está dirixido por Manuela Varela. No elenco artístico participan recoñecidos actores e actrices como Sofía Braxe, Ana Rodríguez, María Luísa Álvarez, Chelo Rodríguez, Isabel Vidal, Begoña Valdés, Cristina García, Antón Amil, Suso Míguez e Pepe Rodríguez.
Esta proposta cultural achegará ao público un teatro próximo e cheo de emocións, mantendo viva a tradición narrativa de Galicia. A entrada será libre ata completar aforo.