Prohibido aparcar no acceso á estación de Betanzos-Infesta polos buses alternativos de Renfe
O Concello de Betanzos prohibirá temporalmente o estacionamento de vehículos no ramal de acceso á estación de Betanzos-Infesta desde a estrada AC-542, coñecida como estrada de Infesta. A medida entrará en vigor o vindeiro 4 de xuño e manterase ata o 11 de xullo.
A decisión busca garantir a circulación dos autobuses que Renfe habilitará como servizo alternativo ao tren mentres duren as obras que Adif está a executar na estación da Coruña. Estes traballos obrigarán a modificar de forma temporal diferentes conexións ferroviarias con orixe ou destino na cidade herculina.
No caso das liñas que unen A Coruña con Ferrol e Lugo, parte dos desprazamentos realizaranse por estrada. As persoas viaxeiras farán en autobús o treito entre A Coruña e Betanzos-Infesta, polo que a estación betanceira funcionará como punto de intercambio entre o transporte ferroviario e o servizo alternativo por estrada.
Para que os autobuses poidan entrar e saír da contorna da estación con seguridade, o Concello considera necesario manter libre de vehículos o ramal de acceso desde a AC-542. A medida pretende facilitar as manobras dos vehículos habilitados por Renfe e garantir a recollida e baixada de pasaxeiros sen incidencias.
O goberno local solicita a colaboración da veciñanza e das persoas usuarias da estación para respectar a sinalización provisional que se instalará na zona. A prohibición de aparcar manterase ata o 11 de xullo, data prevista para recuperar a operatividade habitual do servizo ferroviario nesta fase dos traballos.