Primeiros auxilios para gañar seguridade ante unha emerxencia en A Escada
O Centro Ocupacional A Escada, en Culleredo, acolleu unha xornada formativa en primeiros auxilios dirixida ao seu alumnado. A actividade foi impartida pola Asociación Galega de Técnicos en Emerxencias Sanitarias (Asgate) e combinou explicacións prácticas con exercicios pensados para saber como actuar ante situacións de risco.
Tres monitores de Asgate guiaron o obradoiro, no que as persoas participantes aprenderon nocións básicas de reanimación cardiopulmonar, coñecida como RCP, así como a manobra de Heimlich, empregada nos casos de atragoamento. A sesión tamén incluíu unha aproximación ao uso dos desfibriladores, dispositivos clave na atención a emerxencias cardíacas.
Un dos momentos máis especiais da actividade foi a visita ao interior dunha ambulancia. O alumnado puido coñecer de preto como é este vehículo sanitario, que elementos leva no seu interior e como se desenvolve un traslado en caso de emerxencia. A experiencia buscaba reducir medos, familiarizar ás persoas usuarias cos servizos sanitarios e facer máis comprensible o seu funcionamento.
A actividade contou coa colaboración da empresa Ambulancias SASU, que facilitou o desenvolvemento desta parte práctica da xornada.
Desde o Concello de Culleredo destacan que este tipo de propostas contribúen á formación integral e á inclusión do alumnado do Centro Ocupacional A Escada. O obxectivo é dotar ás persoas usuarias de ferramentas sinxelas e útiles para reaccionar con maior seguridade ante unha emerxencia, ao tempo que se favorece a súa autonomía e confianza.