Polémica en Culleredo pola oposición a enxeñeiro municipal tras un voto particular do secretario do tribunal
O proceso selectivo para cubrir unha praza de enxeñeiro industrial municipal en Culleredo abriu un enfrontamento político entre o goberno local e a oposición, despois de que no expediente conste un voto particular do secretario municipal, que tamén exerce como secretario do tribunal, no que alerta de supostas irregularidades nun dos exercicios.
Segundo expón o PP, ese voto particular recolle por escrito coincidencias entre o exame do aspirante con maior puntuación e a plantilla de respostas do tribunal, en aspectos como estrutura, contidos e formato. A formación asegura que o propio secretario propón medidas dentro do procedemento, como a exclusión do candidato, para evitar unha posible nulidade do proceso. Os populares tamén poñen o foco na tramitación posterior e critican a celeridade do Concello ao avanzar na resolución sen, segundo indican, agardar a esgotar o prazo do recurso de alzada.
A portavoz municipal do PP, Izaskun García, reclama que se dea unha explicación detallada do ocorrido e sostén que non se trata dun debate ‘inventado’, senón dun documento oficial que, ao seu xuízo, obriga a aclaracións. Ademais, o PP reprocha ao alcalde, José Ramón Rioboo, que no último pleno de 2025 tentase minimizar o contido do voto particular cualificándoo de posición minoritaria e centrando a resposta na correlación interna do tribunal.
Pola súa banda, o Concello de Culleredo emitiu un comunicado no que afirma que o proceso selectivo se desenvolveu con plenas garantías legais e conforme ás bases publicadas, respectando os principios de igualdade, mérito, capacidade, publicidade e transparencia. O goberno local subliña que non interveu na elaboración nin corrección das probas, nin na valoración de méritos, e que esas funcións corresponden exclusivamente ao tribunal cualificador.
O Concello detalla que o tribunal estivo composto por seis membros e sostén que, tras revisar o expediente, cinco deles manteñen un criterio coincidente e maioritario avalando a corrección e legalidade do procedemento. Engade que o voto particular do secretario “non representa a posición do órgano colexiado” e nega que evidencie irregularidades obxectivas que comprometan a validez do proceso. No mesmo comunicado, o goberno municipal acusa PP e BNG de facer unha lectura “parcial e interesada” do expediente co obxectivo de xerar sospeitas e danar a imaxe do alcalde.
O executivo local tamén asegura que, de existir constancia fehaciente de irregularidades, trasladaría o expediente ás autoridades competentes, e afirma que non aprecia indicios obxectivos de ilegalidade. Ademais, sostén que cinco dos seis membros do tribunal valorarían emprender accións xudiciais fronte a quen cuestione publicamente a súa actuación sen achegar probas, por un posible prexuízo ao seu honor e reputación.