Piadela consolídase como polo empresarial coa modernización das súas infraestruturas
O Concello de Betanzos deu por finalizado o programa de actuacións no polígono industrial de Piadela, un conxunto de intervencións orientadas a reforzar a súa competitividade e a mellorar as condicións para a implantación de novas empresas e a creación de emprego.
A última fase dos traballos centrouse na renovación integral do sistema de iluminación pública, coa instalación de luminarias LED de alta eficiencia enerxética no marco dos programas impulsados polo Instituto para la Diversificación y Ahorro de la Energía (IDAE). Esta mellora permitiu modernizar o alumeado do parque empresarial, reducir o consumo eléctrico, incrementar a seguridade viaria e mellorar a calidade ambiental do recinto.
Estas actuacións compleméntanse con outras xa executadas, como a mellora dos accesos, a adecuación de viarios interiores, a limpeza e retirada de vexetación en distintas zonas e a renovación da sinalización vertical. Todo isto contribuíu a mellorar de forma notable tanto a imaxe como a funcionalidade dunha das principais áreas económicas da comarca.
A alcaldesa, María Barral, destacou que o obxectivo do goberno local é seguir facendo de Piadela un espazo atractivo para o investimento empresarial, reforzando servizos e infraestruturas que faciliten a chegada de novas compañías e a xeración de emprego estable.
Neste sentido, lembrou tamén a modificación dos usos urbanísticos do polígono, que amplía as posibilidades de implantación de actividades vinculadas ao sector servizos, oficinas, hostalaría, comercio e loxística. Trátase dunha medida coa que se busca adaptar o parque empresarial ás necesidades actuais do mercado e aumentar a súa capacidade de atracción de investimentos.
Segundo o Concello, os resultados desta estratexia xa comezan a ser visibles, con varias naves industriais en construción e contactos con empresas interesadas en establecerse na zona. Ademais, estanse tramitando novos proxectos ligados á ampliación de instalacións produtivas e loxísticas, o que reforza o papel de Piadela como un dos principais focos de actividade económica do norte da provincia.
Barral subliñou que Betanzos vive un momento de impulso económico e urbanístico no que o polígono de Piadela resulta clave. Neste contexto, destacou a importancia do novo Plan Xeral de Ordenación Municipal, aprobado inicialmente, que permitirá consolidar o crecemento empresarial.
O documento urbanístico prevé melloras na conexión entre as dúas áreas do parque empresarial, unha demanda histórica que aumentará a súa funcionalidade, así como a creación de novos espazos para actividades económicas. Ademais, reforza a posición estratéxica do municipio grazas ás súas conexións coa Autovía A-6 e a Autoestrada AP-9.
“O traballo destes anos en infraestruturas, servizos e planificación está dando resultados. Queremos seguir xerando oportunidades para que máis empresas aposten por Betanzos e contribúan á creación de emprego e riqueza”, concluíu a rexedora.