Pavlenha súmase ao cartel do Recorda Fest coa estrea de ‘Ambolo’
O Recorda Fest continúa ampliando o cartel da súa cuarta edición coa incorporación de Pavlenha, unha das voces emerxentes da escena indie estatal. O artista ponferradino chegará á Coruña coa presentación de ‘Ambolo’, o seu segundo traballo, co que reforza unha proposta marcada pola autenticidade, as guitarras e unha escrita moi ligada ás vivencias persoais.
O festival celebrarase os días 4 e 5 de setembro no peirao de Batería, onde volverá reunir algunhas das propostas máis recoñecibles do pop, o indie e a música urbana. A falta de novas confirmacións, Pavlenha súmase a un cartel no que xa figuran Cali y El Dandee, Beret, La M.O.D.A., Taburete, Hey Kid, Hydn, Inazio e Mafalda Cardenal.
Detrás do nome artístico de Pavlenha está Pablo López Torres, músico de Ponferrada que comezou a chamar a atención durante o confinamento, despois de publicar unha versión de Ed Maverick en YouTube. Desde aquela, o proxecto foi medrando ata consolidarse cun público fiel, dous discos publicados e concertos en salas de referencia.
Entre as súas influencias aparecen bandas como Arctic Monkeys, The Strokes ou The Kooks, ademais de artistas como Quique González, Andrés Calamaro ou Pereza. No Recorda Fest fará soar cancións como ‘Salvo cambios’ ou ‘Dímelo tú’, esta última unha das pezas coas que máis se identifica na súa etapa actual.
O propio artista destaca a boa conexión coa comunidade galega e asegura que a cita coruñesa será un dos momentos especiais do final do verán. Pavlenha adianta que levará ao Recorda Fest un directo traballado durante todo o ano e pensado para conectar co público desde a proximidade.
As entradas para a cuarta edición do festival xa están á venda, mentres a organización mantén pendentes novas incorporacións ao cartel, incluídos dous grandes nomes que completarán a programación.