Pablo Vidal será o candidato do BNG á alcaldía de Ordes de cara ás eleccións de 2027
Pablo Vidal, portavoz do grupo municipal do BNG no concello de Ordes, volverá liderar a candidatura da formación nacionalista ás eleccións municipais, unha responsabilidade que asumirá por terceira vez consecutiva. O obxectivo declarado é ampliar o apoio da veciñanza coa vista posta en acadar a alcaldía na cita electoral fixada para o 23 de maio de 2027.
O candidato trasladou o seu agradecemento á militancia do partido polo apoio e a confianza depositados na súa figura. Segundo explicou, os 14 anos que leva exercendo como concelleiro na corporación municipal permítenlle afrontar esta nova etapa coa preparación necesaria para facerse cargo dun goberno local que, ao seu xuízo, leva tempo reclamando un cambio de rumbo.
Vidal puxo o acento nos máis de doce anos que o PP leva á fronte do goberno municipal de Ordes, período no que, lembra, se xestionaron uns 131 millóns de euros procedentes dos orzamentos municipais; ao seu entender, unha marxe de tempo e de recursos máis que suficiente para executar as propostas que o partido popular volve a plantexar agora. O dirixente nacionalista considera que o balance desta etapa se traduce nunha localidade que describe como carente de vida e nun ámbito rural que cualifica de esquecido e desatendido.
Ao seu xuízo, reverter esta situación pasa pola chegada dun novo goberno municipal que achegue ilusión, frescura e disposición ao traballo, e que sexa capaz de escoitar con humildade as demandas que traslada a veciñanza.
O candidato do BNG defende que a súa formación conta cun proxecto que define como serio, ambicioso e transformador, cunha folla de ruta definida sobre as necesidades do municipio para superar o que describe como unha situación de deriva e recuperar o seu papel como referencia dentro da comarca. Neste sentido, Vidal aspira a sumar o respaldo daquelas persoas que, á marxe do seu voto en anteriores citas electorais, compartan a aspiración dun Ordes vivo, dinámico, con servizos de calidade e aberto á integración.
A presentación oficial da candidatura de Pablo Vidal á alcaldía de Ordes terá lugar o vindeiro xoves 22 de outubro, ás 20.15 horas, no auditorio da Casa da Cultura do municipio. O acto contará coa presenza da portavoz nacional do BNG, Ana Pontón. Desde a agrupación local do partido fixeron extensiva a invitación a toda a veciñanza para que se sume a este encontro.