Ouro europeo para o betanceiro Carlos Arévalo nunha final de infarto do K1 200
Carlos Arévalo volveu demostrar que está entre os grandes nomes do piragüismo continental. O deportista betanceiro proclamouse este domingo campión de Europa na proba de K1 200 metros, dentro do Campionato Europeo de Sprint e Paracanoe que se disputa en Montemor-o-Velho, Portugal.
Arévalo asinou unha regata brillante e cruzou a meta en primeira posición cun tempo de 34.103 segundos. O galego superou por unha marxe mínima ao portugués Moisés Baptista, que foi prata con 34.178, e ao húngaro Gergely Balogh, bronce con 34.218.
O ouro individual chega ademais despois doutra gran alegría para o betanceiro, que o sábado xa conseguira a medalla de prata no K4 500 xunto a Adrián del Río, Marcus Cooper e Rodrigo Germade. A final foi extremadamente igualada: Hungría gañou con 1.18.500, mentres que España e Alemaña compartiron a segunda posición co mesmo tempo, 1.18.630.
Con este dobre podio, Arévalo pecha unha fin de semana de enorme nivel e mellora o resultado acadado no Europeo de 2025, cando lograra o bronce no K1 200. O novo título continental confirma o excelente momento competitivo do padexeiro de Betanzos, un dos referentes do piragüismo galego e español.