Os Reis Magos falarán este domingo cos nenos e nenas de Betanzos por radio
Este domingo, 29 de decembro, as Súas Maxestades os Reis Magos de Oriente terán unha cita especial en Betanzos, onde falarán en directo cos nenos e nenas a través da radio. A actividade, organizada polo Radio Club Costa Verde en colaboración co Concello de Betanzos, desenvolverase na praza dos Irmáns García Naveira de 11:00 horas a 13:00 horas.
Os máis pequenos poderán compartir os seus desexos e ilusións dun xeito único, establecendo contacto cos Reis Magos mediante unha transmisión radiofónica aberta a toda a cidadanía. Este evento pretende achegar a maxia do Nadal dun xeito participativo e innovador, consolidándose como unha proposta que mestura tradición e tecnoloxía.
Esta cita é unha oportunidade perfecta para que as familias disfruten dunha experiencia inesquecible e reforcen o espírito do Nadal. Non perdas a ocasión de formar parte desta actividade máxica en Betanzos.