Os Premios Youtubeiras+ levarán a Oleiros o mellor talento dixital en galego
O talento dixital en galego terá unha cita especial en Oleiros o vindeiro mes de xaneiro. O Auditorio Gabriel García Márquez de Mera será o escenario da gala da décima edición dos Premios Youtubeiras+, un certame que leva unha década apoiando e dando visibilidade ás persoas que crean contidos en galego na internet. A gala está prevista para o 30 de xaneiro de 2027.
A edición deste ano chega baixo o lema 'Dez anos en rede' e incorpora como principal novidade un Premio Honorífico á Traxectoria, destinado a recoñecer persoas ou proxectos dixitais que contribuíron ao longo dos anos á creación de contidos en galego e que se converteron en referentes dentro da comunidade dixital. Este galardón non terá dotación económica e será concedido directamente pola organización.
Sete premios e 7.500 euros en total
O certame repartirá 7.500 euros entre sete categorías con dotación económica. Tanto o premio á Canle como o de Creación de Contidos estarán dotados con 1.250 euros, mentres que Pódcast, Revelación, Calidade Lingüística, Rede e Premio do Público recibirán 1.000 euros cada un.
As categorías buscan recoñecer diferentes formas de creación dixital. Así, o premio á Canle está orientado a proxectos especializados nun ámbito concreto, mentres que o de Creación de Contidos pon o foco na personalidade e capacidade comunicativa das persoas creadoras.
Tamén se premian os novos talentos coa categoría Revelación, o uso coidado do galego coa de Calidade Lingüística e a capacidade para xerar comunidade coa categoría Rede. O premio ao Pódcast recoñece especificamente os proxectos sonoros, mentres que o Premio do Público será decidido mediante votación aberta na web do certame.
O prazo para participar remata en novembro
As inscricións están abertas ata as 23.59 horas do 15 de novembro de 2026 e poden participar persoas maiores de 16 anos con canles autoproducidas e activas nas redes sociais. A participación é gratuíta e está aberta internacionalmente.
Para poder presentarse, as canles deben ter a maioría das publicacións en galego e contar con polo menos tres publicacións realizadas desde o 16 de novembro de 2025. Os títulos, descricións e subtítulos permanentes tamén deben estar en galego.
No caso do Premio do Público, as propostas poderán realizarse ata a mesma data. Posteriormente abrirase a votación entre o 23 de novembro e o 4 de decembro. Os catro vídeos máis votados pasarán a ser finalistas e o xurado ratificará o resultado conforme ás bases.
Dez anos facendo medrar a creación en galego
Youtubeiras+ naceu a partir dunha iniciativa de diferentes axentes de normalización lingüística para impulsar o uso e o consumo do galego na internet. Desde as primeiras edicións, o proxecto foi ampliando formatos e plataformas ata converterse nun certame aberto ás distintas redes sociais e tamén aos pódcast. Ao longo da súa historia pasaron polo concurso máis de 500 canles.
Na edición de 2025 presentáronse 126 canles e propuxéronse 49 vídeos para o Premio do Público, que recibiu 2.326 votos. A gala celebrouse no Teatro Jofre de Ferrol o pasado mes de febreiro.
A iniciativa está organizada polos servizos de normalización lingüística dos concellos de Ames, Carballo, Ferrol, Moaña, Narón, Oleiros, Pontevedra, Rois, Santiago de Compostela e Teo, xunto coas universidades da Coruña, Santiago de Compostela e Vigo e a Deputación da Coruña.