Os Premios PEL baten marca con 145 candidaturas empresariais
A oitava edición dos Premios PEL da Deputación da Coruña pechou o prazo de presentación cun récord de participación. En total, 145 candidaturas optan aos galardóns, unha cifra que consolida este certame como unha das principais citas de recoñecemento ao talento emprendedor e empresarial da provincia.
A convocatoria repartirá 80.000 euros entre as empresas, microempresas e profesionais autónomos que resulten gañadores nas diferentes categorías. O obxectivo é poñer en valor proxectos que destaquen pola súa capacidade innovadora, a súa traxectoria, a súa implantación no territorio, a aposta pola sostibilidade ou o seu carácter singular.
Nesta edición, 28 novas empresas concorren ao premio á mellor iniciativa emprendedora, mentres que 38 candidaturas aspiran ao recoñecemento á mellor traxectoria empresarial. Ademais, 26 proxectos preséntanse á nova categoría de territorio sostible e 40 iniciativas competirán polo premio ás propostas empresariais máis singulares.
A maiores, o xurado rexistrou 13 candidaturas na categoría honorífica, que este ano estará dedicada ás iniciativas transformadoras do rural. Esta mención non terá dotación económica, pero permitirá destacar proxectos cun impacto especial no desenvolvemento do territorio.
Cada unha das catro categorías principais contará, con carácter xeral, cun premio de 20.000 euros. As bases tamén prevén a posibilidade de conceder accésits se a diferenza de puntuación entre as dúas mellores candidaturas é mínima. Nese caso, o primeiro premio sería de 15.000 euros e o accésit de 5.000 euros.
As empresas gañadoras coñeceranse o mércores 19 de xuño nunha gala que se celebrará pola tarde no Coruña Estudo Inmersivo, situado na Cidade das TIC da Coruña. O acto reunirá representantes do tecido empresarial, social e institucional da provincia.