Os Museos Científicos Coruñeses ampliarán horario en xullo e agosto con diversas actividades divulgativas
Co inicio da tempada estival, os Museos Científicos Coruñeses estenden o seu horario de apertura durante os vindeiros dous meses. Será a partir deste luns 1 de xullo. Desta forma, a Casa das Ciencias, a Domus e o Aquarium Finisterrae estarán abertos á cidadanía de 10.00 a 20.00 horas, ata o 31 de agosto.
Cómpre lembrar, en todo caso, que o acceso ao Aquarium Finisterrae pecharase ás 19.00 horas e, no caso da Casa das Ciencias e a Domus, ás 19.30 horas.
Ademais, tamén durante a tempada estival, o Concello ten prevista unha ampla programación de actividades divulgativas e de ocio nos tres museos, ideadas para todos os públicos.
Na Casa das Ciencias, ademais das exposicións interactivas habilitadas no interior, tamén haberá cinco sesións diarias no planetario: "Polaris" (11.30 horas), "Lévame á Lúa" (13.00), "Hazelnuts" (17.00), "Directo" (18.00) e "Biosfera oscura" (19.00). Ademais, entre os días 9 e 14 de agosto, todas as quendas do planetario incluirán unha explicación sobre como ver a choiva de estrelas das Perseidas.
Por outra parte, a Domus abrirá as súas portas a múltiples experiencias interactivas, coas exposicións "Bocados", sobre nutrición e os Obxectivos de Desenvolvemento Sostible (ODS), "Xogo de neuronas" sobre a mente e intelixencia humana e "Homínidos e homínidas", sobre as orixes humanas e a evolución dos trazos que nos identifican.
Máis alá dos seus contidos habituais, no Aquarium Finisterrae haberá actividades e obradoiros sen necesidade de inscrición e sen custo adicional á entrada ao museo:
Alimentación no Nautilus: o público pode observar a alimentación dos habitantes do Nautilus, entre os que se inclúen diferentes especies de tiburóns coma o touro e as musolas. Todos os luns, mércores e venres ás 11.30 horas.
Alimentación de focas: unha actividade na que o público pode contemplar a rutina da alimentación das focas do Aquarium a cargo dos seus coidadores. Todos os días ás 12.00 e ás 17.00 horas.
Monólogos no Aquarium: charlas breves, duns 10 minutos, sobre a bioloxía e curiosidades dalgunhas das especies máis populares do Aquarium (polbos, cabaliños de mar, cágados, medusas...), ofrecidas polo persoal de atención ao público. Todos os días ás 13.00 e 18.00 horas.
O concelleiro de Cultura e Turismo, Gonzalo Castro, convidou a cidadanía a visitar os Museos Científicos Coruñeses e a participar nas actividades previstas. "A programación ideada polo equipo de profesionais dos Museos está ideada para todos os públicos", e busca espertar o interese tanto das crianzas coma dos adultos nas ciencias, o medio ambiente e a tecnoloxía, "facilitándolle tamén unha ferramenta de ocio ás familias durante a tempada de vacacións, unha medida que o Goberno de Inés Rey quere seguir reforzando".