Os Maios enchen de cor a Avenida do Balneario esta fin de semana
A tradición dos Maios volve tomar a Avenida do Balneario coa celebración do 11º Concurso de Maios de Arteixo, unha cita que combina creatividade, traballo colectivo e respecto polas costumes populares. As creacións participantes poderán verse desde este venres e ata o domingo 31 de maio, nunha exhibición aberta á veciñanza e ás persoas visitantes.
O certame reúne propostas elaboradas por centros educativos e asociacións locais, que presentan maios artísticos e tradicionais. A iniciativa busca manter viva unha celebración ligada á primavera, á natureza e á participación comunitaria, ao tempo que dá visibilidade ao traballo feito por colectivos do municipio.
A entrega de premios terá lugar este venres ás 13.00 horas na Capela do Balneario. Alí recoñeceranse os mellores traballos dunha edición que volve converter a contorna do Balneario nun espazo de encontro arredor da cultura popular.
O concurso abre ademais a programación festiva da Festa das Flores 2026. A xornada completarase pola tarde, ás 19.00 horas no Anfiteatro, co espectáculo de rúa 'Hoxe si!', da compañía Sempre arriba, unha proposta de clown, música e acrobacias aéreas con acceso libre.
Coa exposición dos Maios durante toda a fin de semana, Arteixo mantén unha das súas citas tradicionais máis vistosas e participativas, na que a veciñanza pode achegarse para descubrir pezas elaboradas con flores, ramas e outros elementos vexetais.