Os libros toman o Feirón de Arteixo cunha nova xornada de lectura e animación
A lectura sairá este sábado 25 de abril á rúa en Arteixo cunha nova edición do tradicional expurgo de libros no Feirón. A iniciativa, organizada pola Rede Municipal de Bibliotecas con motivo do Mes do Libro, permitirá á veciñanza atopar exemplares de balde procedentes de expurgos bibliotecarios e de doazóns.
A actividade comezará ás 10.00 horas e busca achegar os libros á cidadanía nun espazo aberto e de encontro, recuperando unha tradición que converte o Feirón nun punto de intercambio cultural. As persoas que se acheguen poderán levar obras que forman parte dos fondos retirados das bibliotecas ou cedidas por particulares, dando así unha segunda vida a libros que poden atopar novos lectores.
A xornada contará tamén cunha proposta de animación a cargo de Teatro Calavera, pensada especialmente para o público infantil e familiar. A actuación está prevista arredor das 11.30 horas e servirá para encher de humor e participación a mañá no recinto feiral.
Esta saída das bibliotecas á rúa intégrase na programación do Mes do Libro en Arteixo, que durante abril e maio inclúe actividades de narración oral, contacontos, obradoiros e sesións dirixidas a diferentes idades. O obxectivo é fomentar o hábito lector e reforzar o papel das bibliotecas como espazos vivos de cultura, encontro e participación.