Ordes incorpora unha nova senda peonil e unha vivenda social cun investimento de máis de 1,6 millóns de euros
Ordes conta xa con dúas novas actuacións financiadas polo Goberno de España a través do Instituto para a Transición Xusta (ITJ), cun investimento conxunto superior aos 1,6 millóns de euros. Trátase dunha nova senda de mobilidade alternativa entre Ordes e Pontraga e da rehabilitación dun antigo local social no Mesón do Vento para convertelo nunha vivenda de alugueiro social.
O delegado do Goberno en Galicia, Pedro Blanco, participou este mércores na inauguración das dúas actuacións e reivindicou unha Transición Xusta que, segundo sinalou, debe traducirse en novas oportunidades e mellores servizos nos municipios afectados.
Blanco destacou que este proceso debe ir máis alá da creación de emprego e actividade económica e incluír tamén ámbitos como a vivenda, a mobilidade, os servizos e a calidade de vida.
Unha senda de 2,8 quilómetros ata Pontraga
A primeira actuación corresponde ao novo itinerario de mobilidade alternativa situado na DP-5903, que conecta o núcleo de Ordes coas instalacións socioculturais e de lecer da Estación de Pontraga.
O proxecto contou cun investimento de 1.484.830,92 euros e permitiu crear unha senda de 2.800 metros de lonxitude e 1,80 metros de ancho.
Entre os elementos incorporados atópase unha pasarela pilotada de 112 metros, ademais de muros de pedra, varandas de seguridade e zonas de descanso. O itinerario dispón tamén de dous puntos de recarga eléctrica para motos, bicicletas e patinetes, así como tres zonas de estacionamento para bicicletas.
A actuación inclúe igualmente un sistema de recompensas dixitais mediante códigos QR co obxectivo de incentivar o uso da senda e reducir os desprazamentos en vehículo privado.
Unha nova vivenda de alugueiro social no Mesón do Vento
A segunda actuación centrouse na rehabilitación do antigo local social do Mesón do Vento, que foi transformado nunha vivenda de alugueiro social.
O investimento ascendeu a 184.211,10 euros e a intervención permitiu renovar integramente un inmoble de 156 metros cadrados, distribuídos en dúas plantas e con tres habitacións.
A rehabilitación realizouse incorporando criterios de eficiencia enerxética e ten como finalidade facilitar o acceso á vivenda e contribuír á permanencia de poboación no territorio.
Máis de 221 millóns para 62 proxectos
Durante a inauguración, Pedro Blanco situou estas actuacións dentro dun programa máis amplo de apoio aos territorios afectados polo peche de instalacións enerxéticas vinculadas ao carbón.
Segundo os datos facilitados pola Delegación do Goberno, desde 2019 o Ministerio para a Transición Ecolóxica e o Reto Demográfico concedeu máis de 221,6 millóns de euros para 62 proxectos nas zonas de Transición Xusta de Meirama e As Pontes.