Sociedade

O evento contará co espectáculo do mago Dani Polo e a visita dun osiño polar, prometendo unha tarde de ilusión no Parque da Constitución

Ordes prepárase para celebrar a chegada do Nadal co tradicional encendido das luces. O evento, organizado polo centro comercial aberto AECOR, terá lugar o martes 5 de decembro ás 18:00 horas no Parque da Constitución. Este ano, o acto contará cunha sorpresa máxica coa participación do mago Dani Polo, que ofrecerá un espectáculo especial para todos os asistentes. Ademais, os máis pequenos poderán gozar da visita dun osiño polar que fará as delicias de nenos e nenas.

Esta actividade, organizada coa colaboración do Concello de Ordes e da Xunta de Galicia, promete ser un evento especial para dar comezo á tempada de Nadal. Veciños e visitantes están convidados a unirse á celebración e gozar dun momento cheo de maxia e ilusión.