Oleiros organiza campamentos de Nadal para axudar á conciliación

O Campa Nadal celebrarase na Finca Tenreiro e ofrecerá actividades para nenos e nenas de entre 3 e 11 anos durante as vacacións escolares

O Concello de Oleiros pon en marcha o Campa Nadal, unha iniciativa dirixida a nenos e nenas de 3 a 11 anos, co obxectivo de facilitar a conciliación da vida familiar e laboral durante o Nadal. Este campamento desenvolverase os días 23, 24, 26 e 27 de decembro no Albergue municipal da Finca Tenreiro, en Nós, en horario de 9:00 a 14:00 horas.

Ademais de axudar na conciliación, o campamento busca fomentar hábitos de vida saudables, potenciar as habilidades artísticas dos máis pequenos e promover valores positivos.

O prazo de preinscrición abrirase o luns 25 de novembro a través da páxina web municipal. No caso de haber máis solicitudes que prazas dispoñibles, realizarase un sorteo público na Fábrica.