Oleiros inaugurará o Paseo Pepe Mujica coa presenza da senadora uruguaia Blanca Rodríguez
O Concello de Oleiros inaugurará o sábado 17 de outubro o Paseo Pepe Mujica, nun acto que contará coa presenza de destacadas figuras da política uruguaia e que está a xerar interese no país suramericano. A cita terá lugar ás 12:00 horas na zona do Paraíso e será pública e aberta á participación da cidadanía.
Entre as principais asistentes estará a senadora do Frente Amplio Blanca Rodríguez, de ascendencia galega, que se desprazará a Oleiros para participar na inauguración. Rodríguez desenvolveu durante décadas unha recoñecida traxectoria profesional como xornalista de televisión e radio antes de incorporarse á política da man de José Mujica.
Foi precisamente Mujica quen presentou publicamente a Rodríguez ante os medios de comunicación e a sociedade uruguaia en 2024. A súa participación neste acto ten un significado especial pola relación persoal e política que mantivo co expresidente uruguaio e pola súa actual proxección dentro da política do país.
Segundo o Concello, Rodríguez está a impulsar avances nos ámbitos da infancia, a educación e a convivencia democrática, cuestións que a están a situar como unha das principais figuras do MPP (Movimiento de Participación Popular), sector político de Mujica integrado no Frente Amplio, actualmente no Goberno de Uruguai.
A inauguración contará tamén coa intervención do embaixador da República Oriental do Uruguai en España, Bernardo Greiver del Hoyo, e do alcalde de Oleiros, Ángel García Seoane.
A homenaxe a Pepe Mujica terá ademais a participación de Lucía Topolansky, exvicepresidenta de Uruguai e compañeira de vida do expresidente. A intención inicial de Topolansky era acudir persoalmente a Oleiros, pero circunstancias persoais impedirán finalmente o seu desprazamento.
A exvicepresidenta participará no acto mediante unha videoconferencia que será proxectada nunha pantalla xigante, permitindo así a súa intervención durante a inauguración do novo paseo.
A xornada estará acompañada pola Banda da Escola Municipal de Música de Oleiros. Antes do comezo do acto, a formación realizará un pasarrúas ao longo de todo o percorrido do novo Paseo Pepe Mujica.
A inauguración está prevista para o sábado 17 de outubro ás 12:00 horas na zona do Paraíso. O acto será de acceso libre e estará aberto a toda a cidadanía.