Oleiros inaugura o Paseo Pepe Mujica coa participación da senadora uruguaia Blanca Rodríguez
O Concello de Oleiros inaugurará o sábado 17 de outubro o Paseo Pepe Mujica, nun acto público e aberto á cidadanía que terá lugar ás 12:00 horas na zona do Paraíso. A homenaxe contará coa presenza da senadora do Frente Amplio uruguaio Blanca Rodríguez e do embaixador de Uruguai en España, Bernardo Greiver del Hoyo, ademais da intervención do alcalde, Ángel García Seoane.
A Banda da Escola Municipal de Música de Oleiros será a encargada de amenizar a xornada e realizará un pasarrúas por todo o percorrido do novo paseo antes do comezo da cerimonia.
A participación de Blanca Rodríguez dálle unha dimensión internacional á inauguración. A senadora, de ascendencia galega, desenvolveu durante décadas unha recoñecida carreira como xornalista de televisión e radio antes de incorporarse á política da man de José Mujica, quen a presentou publicamente en 2024. A súa relación persoal e política co expresidente uruguaio reforza o significado da homenaxe.
O acto contará tamén coa participación de Lucía Topolansky, exvicepresidenta de Uruguai e compañeira de vida de Mujica. Aínda que tiña previsto viaxar a Oleiros, finalmente intervirá por videoconferencia debido a circunstancias persoais. A súa mensaxe emitirase nunha pantalla xigante durante a cerimonia.