Oleiros gañará máis de 30.000 metros de solo público cunha nova urbanización canda a rotonda das Olas
O Concello de Oleiros anunciou o desenvolvemento dunha nova urbanización que incrementará o patrimonio municipal en máis de 30.000 metros cadrados. O terreo sitúase entre a rotonda das Olas e a piscina municipal, e máis da metade da superficie resultante pasará a ser de titularidade pública.
Dentro desa superficie pública reservarase unha zona verde de uso exclusivo pensada para ampliar a área de recreo do CEIP Rabadeira. Con iso búscase mellorar as instalacións do centro educativo e aumentar os espazos dispoñibles tanto para actividades docentes como recreativas do alumnado.
A actuación tamén afectará aos accesos ao centro de saúde da zona, reordenándoos para facilitar a circulación dos veciños. Así mesmo, habilitaranse novas prazas de aparcamento orientadas a cubrir a demanda existente neste punto do municipio. A isto súmase a creación de zonas verdes adicionais, pensadas como espazos de lecer e estancia ao aire libre para o conxunto da cidadanía.
Segundo explicou o Concello, este proxecto urbanístico xa permitiu con anterioridade dispoñer dos terreos necesarios para construír o propio centro de saúde, e tamén fixo posible a apertura da circunvalación de Oleiros, unha vía que o goberno local considera clave para a mobilidade municipal ao enlazar de forma directa coa vía Ártabra.
Dende o Concello enmárcase esta intervención dentro dunha estratexia de crecemento urbanístico que, segundo sinalan, pretende ser ordenado e estar orientado á xeración de novos espazos públicos, así como á mellora de servizos e equipamentos municipais para o conxunto dos veciños de Oleiros.