Oleiros estrea a súa carreira popular cun percorrido de 8,5 quilómetros por Iñás e Nós
Oleiros incorporará unha nova cita ao seu calendario deportivo coa celebración da primeira edición da Carreira Concello de Oleiros, prevista para o vindeiro domingo 18 de outubro. A competición terá unha distancia aproximada de 8,5 quilómetros e discorrerá por vías urbanas, camiños e sendeiros das parroquias de Iñás e Nós.
A saída e a meta estarán situadas fronte á Casa do Pobo de Iñás. A carreira comezará ás 12.00 horas e as persoas participantes disporán dun máximo dunha hora e media para completar o percorrido.
A proba está aberta a maiores de 13 anos e non será necesario contar con licenza federativa para participar. O prazo de inscrición permanecerá aberto ata mañá, martes, cunha cota de cinco euros por persoa.
Con esta primeira convocatoria, o Concello busca ampliar a oferta de actividades deportivas e ofrecer unha oportunidade para combinar o exercicio físico co descubrimento dalgúns dos espazos naturais máis destacados do municipio, entre eles o paseo fluvial.