Oleiros celebra o Nadal co Concerto de Corais no Auditorio García Márquez o domingo
O Auditorio Gabriel García Márquez de Mera será o escenario do Concerto de Nadal de Corais do Concello de Oleiros, que se celebrará o vindeiro domingo 15 de decembro ás 19:30 horas. O evento reunirá as corais máis representativas do municipio nunha xornada que combina música e espírito comunitario.
No concerto actuarán a Coral Polifónica Lembranzas de Santa Cruz, o Coro de Oleiros, a Coral Polifónica de Mera e a Coral Airiños de Nós. Tras as súas interpretacións individuais, as agrupacións unirán as súas voces para interpretar conxuntamente a panxoliña popular Cun sombreiriño de palla, pechando o acto cun momento especial.
O Concello organiza este concerto como parte das súas iniciativas para promover o canto coral como expresión cultural e artística, destacando ademais o seu valor como ferramenta para fortalecer a convivencia entre a veciñanza. A entrada será gratuíta, e anímase á cidadanía a participar desta cita musical.