Oleiros aproba no pleno unha nova Ordenanza de Inclusión Social
O pleno municipal do Concello de Oleiros celebrado onte á tarde aprobou a modificación de crédito para a concesión de axudas ás familias para a asistencia a comedores escolares, a aprobación da OMIS ou a solicitude á Deputación Provincial de subvención para a realización da feira de olería Alfaroleiros; entre outros asuntos.
O Concello de Oleiros ten regulamentado distintos recursos para facer fronte a situacións de desprotección que non son cubertas por ningunha outra administración pública. Para acadar unha maior fortaleza e axilidade de resposta na cobertura das necesidades básicas dos veciños e veciñas de Oleiros, o Goberno municipal aprobou unha nova ordenanza de medidas de inclusión social, para facer fronte á forte inflación vivida nos últimos anos.
Entre outros cambios, esta nova ordenanza contempla un incremento das prestacións económicas e un aumento das axudas e descontos por aluguer ou hipoteca. Así mesmo, increméntanse as contías das medidas de apoio na alimentación e na hixiene persoal e doméstica en todas as súas modalidades.
En todos os casos, as axudas económicas van estar referenciadas en base ao IPREM, con distintas porcentaxes. Tamén se terá en conta o número de persoas integrantes da unidade familiar.
Nas prestacións de apoio ao comedor escolar, mantense o pagamento do 100% ás familias en graves dificultades económicas. Ademais, haberá bonificacións do 60% e do 40%, en función dos ingresos da renda familiar.
Na articulación de todas as medidas tamén se considera fundamental traballar a prol de apostar por respostas cada vez máis dignas, respectuosas e menos estigmatizantes para a poboación, sendo o obxectivo que a oferta se produza nun contexto de confianza mutua, diálogo e apoio coa administración e cos equipos profesionais que teñen encomendada esta tarefa.