O XXV Guísamo Folk converterá este sábado o Campo da Feira nun gran escenario da música galega
O Campo da Feira de Guísamo prepárase para acoller este sábado, 22 de agosto, unha edición moi especial do Guísamo Folk, que alcanza os seus 25 anos convertido nunha das citas culturais de referencia de Bergondo. O festival celebrará as súas vodas de prata co seu cartel máis amplo ata a data, combinando grandes nomes da música galega con propostas máis contemporáneas e mantendo o carácter familiar e festivo que acompañou á cita ao longo da súa traxectoria.
A xornada comezará ao mediodía e prolongarase ata a madrugada con Treixadura, a Agrupación de Música Tradicional de Bergondo máis Amig@s, Luar na Lubre, Radio Cos, Alana e The Rapants como protagonistas.
25 anos de música e tradición en Guísamo
A edición deste ano servirá tamén para poñer en valor a historia do festival. O Guísamo Folk ten as súas raíces nos festivais organizados en Guísamo durante os anos 80 por un grupo de veciños e veciñas, unha primeira etapa que tivo que interromperse despois de 1986 por problemas económicos.
No ano 2000, o festival recuperou a súa actividade e desde entón consolidouse como unha das citas musicais do verán en Bergondo. O Concello quere aproveitar agora o 25 aniversario para homenaxear aquelas persoas que impulsaron as primeiras edicións e recuperar elementos daquela época, como as pegatinas e os escudos utilizados daquela.
A celebración mantén ademais algúns dos elementos que acompañaron o festival ao longo dos anos, como a comida campestre, os xogos tradicionais e as actividades para diferentes públicos. A cita foi ampliando a súa proposta musical sen perder o seu vínculo coa cultura galega e coa tradición.
Un cartel que une tradición e novas sonoridades
Un dos obxectivos desta edición é precisamente reunir diferentes xeracións e estilos arredor da música galega. Así, o programa combina referentes da música tradicional e folk con artistas que exploran novas formas de achegarse á raíz.
Treixadura será a encargada de abrir a xornada e chegará a Guísamo co seu novo traballo, Portalén. A formación presentará este sábado o seu novo disco nun concerto programado ás 13.00 horas.
Tamén terá un papel destacado Alana, que actuará ás 23.30 horas e aproveitará a súa presenza no festival para presentar Un saber, o seu segundo traballo discográfico. O grupo parte do patrimonio oral e musical galego para combinar instrumentos e melodías de raíz con bases electrónicas e elementos próximos ao pop.
A noite prolongarase ata a madrugada con The Rapants, que actuarán ás 01.45 horas e levarán ao Campo da Feira a súa proposta de guitarras eléctricas, electrónica e sons próximos á música disco a partir do seu último traballo, Rapants Club.
O cartel complétase con Luar na Lubre, Radio Cos e a Agrupación de Música Tradicional de Bergondo máis Amig@s, configurando unha programación que percorre diferentes formas de entender a música galega.
Unha xornada máis alá dos concertos
O Guísamo Folk volverá combinar a programación musical con diferentes actividades durante o día. O Campo da Feira acollerá a tradicional comida campestre, ademais de obradoiros, xogos tradicionais, postos de artesanía e espazos de comida e bebida xestionados por entidades do municipio.
Tamén haberá propostas dirixidas ao público infantil, con obradoiros de atrapasoños e instrumentos musicais, xogos xigantes de madeira, un recuncho artístico e unha zona de movemento.
A organización preparou ademais un dispositivo específico ante a previsión de asistencia. As reservas das mesas de pedra do Campo da Feira abrirán este venres ás 15.00 horas e haberá outras 19 mesas dispoñibles o sábado pola mañá.
Deste xeito, o XXV Guísamo Folk afronta a súa edición máis especial cunha xornada pensada para vivir o festival desde o mediodía ata ben entrada a madrugada, mantendo o vínculo coas súas orixes e ampliando ao mesmo tempo a súa aposta polas novas sonoridades da música galega.