O ximnasio municipal de Carral recupera a súa sede tras as obras no complexo deportivo
O ximnasio municipal de Carral volverá funcionar no Complexo Deportivo Municipal tras rematar as obras de mellora e ampliación das instalacións. A actuación permitiu modernizar os espazos destinados á práctica deportiva e reforzar os servizos que se prestan ás persoas usuarias, especialmente no ámbito do ximnasio e das actividades dirixidas.
A reapertura oficial celebrarase este sábado, 6 de xuño, a partir das 11.30 horas, cun acto institucional e de portas abertas no que a veciñanza, as persoas abonadas e os colectivos deportivos poderán coñecer de primeira man os novos espazos, a distribución renovada do complexo e as melloras executadas durante os últimos meses.
Entre as intervencións máis destacadas figura a ampliación da zona de ximnasio en máis de 100 metros cadrados, unha actuación que permitirá aumentar a capacidade do servizo e ofrecer un espazo máis cómodo e funcional. Ademais, habilitouse unha nova sala de actividades dirixidas de 150 metros cadrados, pensada para mellorar as condicións nas que se desenvolven as diferentes propostas deportivas.
O obxectivo destes traballos é adaptar o Complexo Deportivo Municipal ás necesidades actuais das persoas usuarias, gañando superficie, comodidade e posibilidades de uso. A mellora permitirá tamén reorganizar a actividade deportiva nunhas instalacións máis amplas e preparadas para acoller tanto o traballo individual no ximnasio como as sesións colectivas.
Para completar o traslado, a montaxe e a posta a punto da maquinaria e do equipamento deportivo desde o Pavillón Municipal de O Espiño ata o Complexo Deportivo Municipal, o ximnasio permanecerá pechado os días 4 e 5 de xuño. Durante os últimos meses, mentres se executaban as obras, a actividade desenvolveuse de maneira provisional no pavillón para garantir a continuidade do servizo e reducir as molestias ás persoas usuarias.
A actividade ordinaria retomarase o luns 8 de xuño, xa nas instalacións renovadas do Complexo Deportivo Municipal. Tamén volverán á nova sala as clases de pilates, que manterán os seus horarios habituais.
Os horarios de apertura serán os habituais: de luns a venres, de 09.00 a 15.00 horas e de 16.30 a 23.00 horas, e os sábados, de 10.00 a 13.00 horas.
As persoas interesadas en recibir máis información poden contactar co Complexo Deportivo Municipal no teléfono 678 33 88 47 ou a través do correo electrónico complexo.deportivo@carral.es.