Emprego | Sindicatos

CIG, CCOO e UGT convocan unha primeira protesta o 9 de xullo no polígono da Agrela e denuncian a falta de avances en salarios, xornada e condicións laborais

O conflito laboral no sector do transporte de mercadorías por estrada da provincia da Coruña entra nunha nova fase. Os sindicatos CIG, CCOO e UGT anunciaron a convocatoria de mobilizacións tras a ruptura das negociacións do convenio colectivo provincial, ao considerar insuficiente a posición da patronal e denunciar a súa negativa a abordar as principais demandas da parte social.

A primeira protesta terá lugar o xoves 9 de xullo, ás 11.00 horas, no polígono da Agrela, na Coruña. Será o inicio dun calendario de mobilizacións que, segundo avanzan as centrais sindicais, se estenderá posteriormente a outros polígonos industriais da provincia con presenza de empresas de transporte de mercadorías.

As organizacións sindicais lembran que en agosto de 2025 se asinou un acordo económico para desbloquear parcialmente a situación e evitar que o convenio continuase acumulando meses caducado. Aquel pacto debía servir como punto de partida para negociar un convenio plurianual que incluíse non só melloras salariais, senón tamén avances na xornada, na remuneración do traballo nocturno e en domingos, no tempo de presenza e nas condicións do persoal de almacén e administración.

Tamén estaba previsto abordar novas realidades do sector, como o uso de camións megadúo ou trens de estrada, vehículos que modifican as condicións de traballo e que, segundo os sindicatos, deben ter reflexo na regulación laboral.

Porén, tras meses de negociación, CIG, CCOO e UGT acusan a patronal de bloquear boa parte destas cuestións e de presentar unha proposta salarial que consideran inaceptable. Segundo denuncian, a oferta para 2026 sitúase por debaixo do IPC interanual de xuño, afectaría só ao salario base e deixaría sen actualizar conceptos como a antigüidade, as dietas ou o plus de longa distancia.

Outro dos puntos de fricción é a aplicación das subas salariais. A patronal propón que entren en vigor desde a sinatura do convenio, mentres que os sindicatos reclaman que teñan efectos desde o 1 de xaneiro.

As centrais advirten de que o sector acumula unha perda de poder adquisitivo superior ao 12% nos últimos anos e aseguran que as condicións actuais están a dificultar a chegada de novos profesionais. Ao seu xuízo, ás esixencias propias do transporte por estrada súmanse salarios que deixaron de facer atractiva esta saída laboral.

Os sindicatos iniciarán agora unha campaña informativa entre os cadros de persoal para explicar a situación e preparar novas protestas. A concentración da Agrela marcará o primeiro paso dun conflito que podería intensificarse se non se retoman as conversas cunha proposta que inclúa melloras económicas e laborais.