O teatro volve reunir persoas de todas as idades en Arteixo cun obradoiro gratuíto
As persoas afeccionadas ás artes escénicas teñen unha nova oportunidade para achegarse ao teatro en Arteixo. A Escola de Teatro Lisístrata desenvolve por segundo ano consecutivo o seu obradoiro na Capela do Balneario, cunha proposta gratuíta, aberta a maiores de 18 anos e sen límite de idade.
A actividade xa arrancou o pasado domingo e as persoas participantes atópanse actualmente inmersas nos ensaios. O traballo terá ademais unha meta concreta a curto prazo: preparar a intervención que o alumnado realizará na Feira Histórica Arteixo 1900, prevista para a terceira semana de outubro.
Trátase do segundo ano que a Asociación Cultural Lisístrata desenvolve este obradoiro en Arteixo, localidade na que ten a súa sede. A proposta mantén a súa aposta por un teatro interxeracional, inclusivo e diverso, no que poden participar persoas de diferentes idades e procedencias.
As sesións teñen lugar todos os domingos, de 18.00 a 19.30 horas, na Capela do Balneario. Ao longo do curso traballaranse diferentes aspectos relacionados coas artes escénicas, como a expresión oral e corporal, a interpretación, o verso, a dicción e a comprensión dos textos.
O obradoiro está pensado tanto para persoas con experiencia previa como para aquelas que queiran iniciarse no mundo da interpretación. A actividade está impartida por unha profesional con formación en Arte Dramática e busca combinar a aprendizaxe teatral coa creación dun espazo de encontro arredor da cultura.
A iniciativa conta coa colaboración do Concello de Arteixo e é de carácter gratuíto. As persoas interesadas en incorporarse poden solicitar información a través do correo escoladeteatrolisistrata@gmail.com.