O teatro escolar e afeccionado celebra a súa gran noite no Colón
O Teatro Colón da Coruña acollerá este venres 12 de xuño, a partir das 20.00 horas, a gala de entrega de premios do XXVII Certame de Teatro Escolar e Afeccionado da Deputación da Coruña, unha cita que volverá reunir compañías, centros educativos e grupos teatrais de distintas idades.
A edición deste ano pecha cunha participación especialmente destacada. En total, 947 persoas formaron parte do certame entre alumnado, docentes, actores, actrices, direccións e equipos de apoio. Durante catro meses representáronse 74 obras, consolidando esta iniciativa como un dos escaparates máis relevantes das artes escénicas non profesionais e escolares en Galicia.
As propostas chegaron maioritariamente da provincia da Coruña, aínda que tamén participaron grupos doutras zonas de Galicia e de comunidades como Madrid e o País Vasco. Do total de obras, 35 corresponderon á categoría afeccionada e 39 ás escolares, repartidas entre 21 infantís, 14 cadetes e 4 benxamíns.
Ao longo dos últimos meses, o IES Rosalía Mera, centro da Deputación que organiza historicamente o certame, converteuse nun punto de encontro para o teatro afeccionado. As representacións celebráronse durante as fins de semana e permitiron achegar ao público o traballo escénico de grupos moi diversos.
A gala servirá para recoñecer as mellores montaxes, interpretacións e propostas escénicas desta XXVII edición. Máis alá dos premios, o certame busca poñer en valor o teatro como ferramenta educativa, cultural e de desenvolvemento persoal, tanto para a mocidade como para os grupos sénior que tamén participan nesta convocatoria.