O Seminario de Estudos do Valadouro presenta na Coruña o seu caderno número 20
O Seminario de Estudos do Valadouro dará a coñecer o vindeiro mércores 18 de novembro o seu caderno número 20, unha nova publicación dedicada á investigación, á historia e á memoria do territorio. O acto terá lugar ás 13.00 horas no Salón de Graos da Facultade de Filoloxía da Universidade da Coruña (UDC).
O volume leva por título 'Traizóns e pranto da Frouseira' e está asinado por Antón Xosé Meilán García e Carlos López Fernández. A presentación contará coa participación de Miro Casabella, Delfina Ruibal, M.ª Isabel Andrade, Sara Petrizzo e Erea Estévez.
Esta nova entrega súmase ao labor que desenvolve o Seminario de Estudos do Valadouro para recuperar, preservar e divulgar o patrimonio histórico e cultural da comarca, a través de publicacións e iniciativas de investigación.
A edición conta co apoio económico da Deputación de Lugo e coa colaboración do Grupo de Investigación ILLA da Universidade da Coruña. O caderno número 20 continúa así a colección coa que a entidade contribúe ao coñecemento e á difusión da memoria e da identidade do territorio.