O (S8) da Coruña, premiado en CINEMANÍA polo mellor cartel de festival de cinema en España
A segunda edición dos Premios Cruz Novillo de CINEMANÍA ao mellor cartel cinematográfico recoñeceu o talento de PEGA Estudio, que recibiu o galardón ao mellor cartel de festival de cinema en España polos deseños da XV edición do (S8) Mostra Internacional de Cinema Periférico da Coruña. A directora do certame, Ana Domínguez, foi a encargada de recoller o premio.
A identidade visual desta edición do (S8) bebe das cartas do tarot, como O Mago, Os Namorados, A Forza e A Roda da Fortuna, símbolos que conectan co misticismo e a maxia presentes na obra do cineasta homenaxeado este ano, Kenneth Anger. Esta proposta creativa reflicte a aposta pola orixinalidade e pola conexión do festival co cinema experimental.
A cerimonia de entrega celebrouse na Fundación Antonio Pérez, en Conca, patrocinada por Turismo Castela-A Mancha e coa colaboración do estudo Cruz máis Cruz. Nesta segunda edición, ademais das categorías tradicionais ao mellor cartel de cinema español e internacional, engadiuse por primeira vez un premio ao mellor cartel de festival, un recoñecemento que levou a A Coruña o (S8).
O xurado estivo composto por figuras destacadas do deseño, a arte e a crítica cinematográfica, como Pepe Cruz Novillo, Mike Villanueva, Carmen Martín, David García-Asenjo, Andrea G. Bermejo e Carlos Marañón.