O río Valiñas volve ser obxecto de seguimento ambiental dentro do Proxecto Ríos
O colectivo Pedras Galladas e o Centro Social Ledoñés continúan co seguimento ambiental do río Valiñas dentro do Proxecto Ríos, unha iniciativa impulsada por ADEGA para fomentar a participación cidadá no coñecemento, coidado e defensa dos ecosistemas fluviais galegos.
As entidades xa realizaron o pasado mes de abril unha inspección do tramo do río que Pedras Galladas ten en custodia ao seu paso por Ledoño. Durante esa actividade analizouse o estado da auga, a biodiversidade presente na contorna e a situación da ribeira, dando continuidade a un traballo que se desenvolve dúas veces ao ano, en primavera e outono.
Este seguimento periódico permite comprobar a evolución do río e detectar posibles cambios no seu estado. Desde os colectivos lembran que factores como as choivas, os movementos de terra, os vertidos ou as modificacións nos usos do solo poden alterar de maneira rápida a saúde dun ecosistema fluvial.
Co obxectivo de ampliar esa visión do Valiñas, Pedras Galladas volverá colaborar co Centro Social Ledoñés, que tamén participa no Proxecto Ríos cun tramo en custodia situado río abaixo. A nova actividade celebrarase este sábado 16 ás 10.30 horas, con punto de encontro no Centro Ledoñés.
Desde alí, as persoas participantes desprazaranse a pé ata a zona de inspección, no acceso ás Naveiras desde a rotonda do polígono de Ledoño. A xornada incluirá tarefas de observación do río e da súa ribeira, identificación de flora e fauna e detección de posibles impactos ambientais, seguindo a metodoloxía e empregando os materiais facilitados polo Proxecto Ríos.
As entidades participantes destacan a importancia da custodia do territorio e da colaboración veciñal para coñecer mellor o estado dos ríos da comarca. O obxectivo é reforzar a implicación cidadá na protección do patrimonio natural e manter unha vixilancia continuada sobre espazos fluviais próximos.