Sociedade

Terá lugar no centro social de San Diego e formará parte do Festival de Cinema Intersección que proxectará o filme 'KEDI Gatos de Istambul'

Imaxe de gatos da rúa

Este sábado 22 de xuño terá lugar no Centro Cívico San Diego da Coruña un coloquio para tratar a vida dos gatos da rúa desde diferentes puntos de vista. Así é a estrea do festival 'Fóra de Campo', que nesta edición comeza cunha xornada de concienciación sobre a protección e o coidado animal, en colaboración coa Asociación Protectora de Animais Gatocan.

A xornada, gratuita, comezará ás 18.00 horas coa proxección do documental KEDI (Gatos de Istambul)" rodado en 2016 por Ceyda Torun e que pretende mostrar a esencia do que significa ser un gato rueiro en Istambul.

Seguidamente, sobre as 19.30, dará comezo o coloquio no que intervirán:

• Ana Julia Harfuch, veterinaria e xerente da Clínica do Sol/MiVet
• Belén Placer, integrante da Asociación Xuntos As Mariñas, xestora de colonias felinas en Miño
• Octavio Villazala, director do Centro Canino Montegatto, experto en modificación de conduta e educador canino
• Josefina Fernández, antiga membro da Patrulla Verde da Policía Local da Coruña
• Beatriz Martin, presidenta da Asociación Protectora de Animais Gatocan

A moderadora do evento será Mónica Cubeiro, directora de 'Somos Pet Friendly'. Neste sentido Beatriz Martín, presidenta de Gatocan sinalou o seu agradecemento a 'Intersección Fóra de Campo' por contar con Gatocan "para fomentar o diálogo e a reflexión sobre o mundo dos gatos rueiros e as colonias felinas.”