O rastro sobre xabaril citará en Ordes aos especialistas do campionato estatal
O Concello de Ordes acollerá o sábado 27 de xuño o XXXIII Campionato de España de Rastro sobre Xabaril e a III Copa de España Xuvenil, unha cita de referencia para as persoas afeccionadas a esta modalidade cinexética, na que os cans e os seus guías poñen a proba a súa capacidade de seguimento sobre rastro.
A competición está organizada pola Real Federación Española de Caza e pola Federación Galega de Caza, coa colaboración do Concello de Ordes e outras entidades. O evento reunirá participantes chegados de diferentes puntos do Estado e converterá o municipio nun dos focos da actividade deportiva e federativa vinculada á caza durante esa fin de semana.
O programa comezará xa o venres 26 de xuño en Sigüeiro. Ás 19.00 horas está prevista a recepción das persoas participantes no Centro Cultural Fernando Casas e Novoa, situado na praza do Concello. Máis tarde, ás 21.30 horas, celebrarase a cea de benvida no pavillón Juanito Amigo Ferreiro, na rúa Pablo Iglesias, 2.
A xornada central será o sábado 27. Entre as 07.30 e as 08.00 horas, os participantes concentraranse no Hotel Restaurante Barreiro, situado na estrada A Coruña-Santiago, quilómetro 32, en Castrelos, Leira-Santa María. A saída está prevista para as 08.30 horas e a chegada á zona da proba será arredor das 09.00 horas.
O comezo da competición está fixado para as 09.35 horas. Segundo o programa, ás 12.00 horas haberá unha parada para a degustación dun taco campero, mentres que a final do campionato arrancará ás 13.00 horas.
A clausura terá lugar no Restaurante Avelino, na rúa A Quenlla, 1, no Mesón do Vento, onde ás 15.00 horas se celebrará a comida final. A entrega de trofeos e premios está prevista para as 17.00 horas, momento no que tamén se realizará a despedida oficial e a saída cara aos respectivos destinos.
Desde a organización lembran que os horarios son orientativos, polo que poderían sufrir modificacións en función do desenvolvemento da proba.