O pumptrack toma A Galea cunha nova cita ciclista aberta á participación local
As pistas da Galea converteranse o sábado 30 de maio nun punto de encontro para o ciclismo coa celebración do Gran Premio de Pumptrack Concello de Miño, unha proba que busca consolidar o circuíto municipal como espazo deportivo de referencia para as modalidades sobre rodas.
A cita foi presentada nas propias instalacións da Galea nun acto no que participaron o alcalde, Manuel Faraldo; o concelleiro de Deporte, José Manuel Pantín; e o presidente do Club Sport Kids, Marcos Porto. A organización corre a cargo de Sport Kids, coa colaboración do Concello de Miño e no marco da actividade federativa galega.
O evento forma parte do calendario da Federación Galega de Ciclismo como proba de BTT Pump Track en Miño, incluída na Copa Galicia da especialidade. Esta disciplina combina velocidade, técnica e control sobre un trazado de curvas e ondulacións, no que os participantes avanzan aproveitando o impulso do corpo e a inercia da bicicleta.
O Concello destaca que esta convocatoria permitirá seguir dinamizando a zona deportiva da Galea e achegar o pumptrack a deportistas de diferentes niveis. A proba tamén servirá para dar visibilidade a unha instalación que xa se está a converter nun novo espazo de encontro para a mocidade e para as persoas afeccionadas ao ciclismo.
As inscricións deberán realizarse a través da Federación Galega de Ciclismo. Ademais, o mesmo día da carreira abrirase un prazo específico para a Liga Local, entre as 15.00 e as 15.30 horas, pensado para facilitar a participación da veciñanza.
Con esta proba, Miño reforza a súa aposta polo deporte ao aire libre e pola diversificación da oferta deportiva municipal. A celebración do Gran Premio de Pumptrack engádese así ás actividades que buscan poñer en valor A Galea como un espazo activo, accesible e vinculado á práctica deportiva.