O pulso pola Casa Cornide segue adiante e o Pleno de A Coruña impulsa novos proxectos culturais e de protección patrimonial
O Pleno municipal da Coruña acordou este xoves, 5 de marzo de 2026, continuar co procedemento iniciado para a recuperación da Casa Cornide. A decisión chega despois de que a familia Franco presentase un recurso no que pedía ao Concello que desistise do proceso de expropiación e declarase nulo o expediente. A corporación aprobou declarar a non caducidade do procedemento de revisión de oficio dos acordos de 1962 que posibilitaron que o inmoble rematase en mans da familia do ditador.
O concelleiro de Cultura e Turismo, Gonzalo Castro, defendeu no debate a postura municipal e o interese xeral do proceso, unha tese que, segundo sinalou o goberno local, conta con respaldo de informes xurídicos e reforza a decisión de seguir adiante.
A mesma sesión serviu tamén para avanzar nunha demanda histórica en Palavea. O Consistorio aprobou o estudo de detalle para levantar a nova biblioteca pública no soar do antigo mercado, que será derrubado conforme ao plan validado nunha Xunta de Goberno Local extraordinaria o pasado 19 de febreiro. A primeira fase de demolicións conta cun investimento de 51.854,34 euros e o proxecto, no seu conxunto, supera o millón de euros. O concelleiro de Economía e Planificación Estratéxica, José Manuel Lage, salientou que Palavea disporá dunha infraestrutura cultural que o barrio leva anos reclamando e enmarcou a actuación na vontade de estender servizos e equipamentos a todos os distritos.
No apartado urbanístico, o Pleno aprobou tamén a proposta de modificación puntual do PXOM para incorporar novos elementos ao catálogo de protección. A medida, explicada polo concelleiro de Urbanismo, Rehabilitación e Vivenda, Francisco Díaz, busca blindar espazos e construcións con valor etnolóxico, arquitectónico, cultural ou urbanístico que ata agora quedaban fóra do paraugas do plan xeral. En total, amplíase a protección a 3 elementos etnolóxicos e 74 arquitectónicos, ademais do tramo coruñés do Camiño de Santiago Inglés.
Entre as novas incorporacións figuran as fontes do Corgo, Monelos e As Xubias de Abaixo, de propiedade municipal, que pasan a ter nivel de protección integral. No ámbito arquitectónico, inclúense tamén antigas estruturas portuarias na praza da Palloza e peiraos das Xubias de Abaixo, xunto con edificios repartidos por distintos puntos da cidade. Do total, 68 elementos terán protección ambiental e 6 contarán con protección estrutural.
Por último, a corporación resolveu a renovación do convenio de transferencia das competencias de convocatoria de prazas do corpo de Policía Local, que seguirá asumindo a Academia Galega de Seguridade Pública. A concelleira de Seguridade Cidadá e Interior, Montse Paz, indicou que a concertación do convenio permitirá simplificar e facer máis áxil o proceso selectivo.