O PSOE reclama á Xunta un plan urxente para reforzar a seguridade da AC-552 en Arteixo
O Grupo Municipal Socialista de Arteixo levará ao próximo pleno unha proposta para reclamar á Xunta de Galicia un Plan Integral de Seguridade para a AC-552, unha das principais vías de comunicación do municipio e un eixe que, segundo os socialistas, soporta unha elevada presión de tráfico debido ao desenvolvemento industrial da zona.
A formación tamén pedirá que a AG-55 sexa gratuíta, ao considerar que a existencia dunha peaxe obriga a numerosos vehículos, incluídos camións, a utilizar a AC-552 como alternativa.
O PSOE de Arteixo sostén que a estrada presenta diferentes puntos que requiren actuacións para mellorar a seguridade tanto dos condutores como dos peóns. Por iso, a moción formula un listado de intervencións ao longo do percorrido comprendido entre Meicende e Larín.
Actuacións en distintos puntos da AC-552
En Meicende, os socialistas propoñen medidas relacionadas co control do po xerado polas plantas de formigón, así como sistemas de limpeza de rodas para os camións que acceden á estrada.
En A Maceira, en Pastoriza, e Galán, solicitan reducir a velocidade a 30 quilómetros por hora, reforzar a iluminación e mellorar os pasos de peóns e as paradas de autobús.
Para Vilarrodís, a proposta contempla unha actuación de humanización da travesía ata Sabón, xunto con melloras nos accesos, pasos de peóns e paradas de autobús. Tamén se formula establecer un límite de 30 quilómetros por hora e crear un novo paso de peóns nas proximidades das instalacións de Alumán, en Sabón.
No núcleo urbano de Arteixo, o PSOE propón limitar a 30 quilómetros por hora a velocidade desde Pescanova ata Candame e mellorar os pasos de peóns, con especial atención ao situado xunto ao Telepizza. Tamén reclama completar o sistema de beirarrúas en dirección a Carballo e estudar a construción dunha rotonda no enlace entre a Travesía de Arteixo e a Avenida de Fisterra, en Candame.
A proposta tamén inclúe actuacións en Lañas e Casas Novas, onde os socialistas solicitan mellorar as paradas de autobús e crear novos pasos de peóns na subida a Lañas. Así mesmo, reclaman ordenar o dobre carril e reducir a velocidade no cruzamento coa DP-507, ademais de construír unha rotonda e pasos de peóns en Casas Novas.
A estas medidas súmase a petición de renovar de forma urxente o firme do carril bici no percorrido municipal e avanzar cara á creación dun carril bici continuo.
O PSOE reclama tamén liberar a AG-55
A proposta socialista vincula ademais a situación da AC-552 co funcionamento da AG-55. O partido considera que a existencia de peaxes nesta vía fai que parte do tráfico continúe utilizando a estrada convencional, incrementando a presión sobre unha vía que atravesa diferentes núcleos urbanos de Arteixo.
Os socialistas defenden que a eliminación da peaxe permitiría reducir o número de vehículos que circulan por puntos como Vilarrodís ou o centro de Arteixo, mentres que, en paralelo, reclaman á Xunta investimentos para mellorar as condicións de seguridade da AC-552.
A moción formula así unha intervención global sobre esta estrada, combinando medidas de calmado do tráfico, melloras para os peóns, actuacións nas paradas de transporte público, renovación de firmes e novos elementos de conexión e seguridade.