O PSOE provincial da Coruña reúne o xoves o Consello de Alcaldes e Alcaldesas para analizar o ‘afogo económico’ dos concellos
O PSdeG-PSOE da provincia da Coruña convocou para o xoves 29 de xaneiro o seu Consello de Alcaldes e Alcaldesas, o órgano que reúne ás rexedoras e rexedores socialistas da provincia, coa intención de avaliar o impacto que (segundo o partido) está a ter nos concellos o actual modelo de financiamento autonómico e a asunción de competencias sen dotación económica abonda.
O secretario provincial, Bernardo Fernández, sostén que a Xunta estaría trasladando ás administracións locais responsabilidades propias da comunidade, como o mantemento, a conserxería e a limpeza dos centros educativos ou o Servizo de Axuda no Fogar (SAF), “obrigando aos concellos a asumir un gasto que non lles corresponde”.
Desde o PSdeG advirten de que esta situación prexudica con especial intensidade aos municipios pequenos e medianos, con menos marxe orzamentaria, que (din) ven como cada ano medra a porcentaxe de recursos destinada a servizos que deberían estar cubertos pola administración autonómica.
Na reunión tamén se porá sobre a mesa o Fondo Galego de Cooperación Local. Os socialistas sinalan que o fondo base (o que consideran o único mecanismo con criterios obxectivos) leva anos sen actualizarse, malia o aumento de custos municipais. Mentres, a Xunta defende que o Fondo de Cooperación Local incrementa a súa dotación e anunciou para 2026 unha contía de 187 millóns de euros nos orzamentos.
O encontro do xoves servirá para compartir diagnósticos entre alcaldes e alcaldesas e definir medidas para reclamar un financiamento “xusto”, así como para esixir que cada administración asuma as súas competencias coa correspondente cobertura económica, segundo expuxo o PSdeG-PSOE provincial.