O PSOE de Oleiros presenta alegacións ao regulamento municipal de subministración de auga
O Grupo Municipal Socialista de Oleiros presentou alegacións á Modificación do Regulamento de Subministración Domiciliaria de Auga, solicitando que non se modifiquen os cadros de sancións aplicables aos veciños por fugas fortuítas nas súas instalacións particulares mentres a rede municipal non cumpra coa normativa autonómica en canto a fugas.
Segundo datos de Aquaoleiros, a rede municipal perde unha 32% da auga comprada a Emalcsa, o que equivale a 400.000 euros anuais, unha cifra que cualifican de insostible tanto desde o punto de vista económico como ambiental. Estas cifras están moi por encima do 20% máximo permitido pola Lei de Augas de Galicia (Lei 9/2010), o que podería derivar en sancións importantes para o Concello.
Os socialistas lembran que un informe técnico redactado en xuño de 2021 xa alertaba de que as perdas na rede municipal roldaban o 40% e que, de non realizar investimentos para mellorala, os custos acabarían repercutindo nos veciños.
Críticas á xestión municipal da auga
O PSOE denuncia que o alcalde de Oleiros segue sen atender a urxente necesidade de renovar as infraestruturas de abastecemento e saneamento, a pesar de que as perdas actuais supoñen un grave prexuízo económico e de sustentabilidade. Ademais, critican que o goberno local ha impedido debater no pleno, por segunda vez consecutiva, unha moción socialista para esixir a mellora das redes de subministración e a eliminación de materiais canceríxenos nas tubaxes.
Desde o partido consideran inxusto que se penalice aos veciños por fugas fortuítas nas súas instalacións privadas, cando o principal "derrochador de auga" é o propio Concello, que non investiu o necesario no mantemento e mellora da rede. Por iso, solicitaron modificacións nos artigos 71 e 80 do regulamento, que tratan sobre a redución de avarías fortuítas e as infraccións, respectivamente.
"Quen sanciona ao Concello polas súas perdas?"
O Grupo Socialista cuestiona quen se fará responsable das perdas millonarias provocadas pola falta de investimento no mantemento da rede municipal. Insisten en que non se pode culpar aos veciños por fugas illadas mentres o Concello non predica co exemplo.
"É imprescindible actuar primeiro desde a administración local para manter a credibilidade institucional e non castigar inxustamente aos cidadáns por problemas que o propio goberno municipal non resolve", conclúen.