O PSOE de Oleiros asegura que a xustiza anula de novo a reclamación de 18.594 euros do Concello
O PSOE de Oleiros asegura ter recibido un novo respaldo xudicial fronte ao Concello, despois de que o Tribunal de Instancia da Coruña anulase a resolución municipal que reclamaba á formación 18.594,94 euros, máis os correspondentes intereses.
A sentenza, ditada o 1 de setembro pola Sección do Contencioso-Administrativo do Tribunal de Instancia da Coruña, estima o recurso presentado polo Partido Socialista Obrero Español e declara a nulidade da resolución aprobada polo Pleno do Concello de Oleiros o 31 de xullo de 2025. O tribunal considera que o procedemento de reintegro estaba caducado cando se notificou a resolución ao PSOE.
Segundo recolle o fallo, o expediente fora iniciado polo Pleno o 30 de abril de 2025 e o prazo para resolver era de tres meses. Porén, a notificación da resolución non se puxo á disposición do PSOE ata o 29 de agosto, cando xa transcorrera ese período. A sentenza engade que non consta que se acordase a suspensión do procedemento nin que existise unha causa para facelo.
O tribunal, ademais, impón as costas ao Concello de Oleiros, cun límite máximo de 400 euros nos honorarios do avogado da parte recorrente. A resolución tamén sinala expresamente que contra a sentenza non cabe recurso.
O PSOE fala de 'asfixia económica'
A formación socialista interpreta este novo fallo como un novo revés para o Goberno local de Alternativa dos Veciños. Desde o PSOE de Oleiros denuncian que o executivo estaría utilizando os recursos municipais para exercer presión económica sobre os concelleiros socialistas da oposición.
Os socialistas sosteñen que esta situación se prolonga desde hai máis de tres anos e aseguran que os seus actuais concelleiros non recibiron cantidades correspondentes ás asignacións municipais, algo que, segundo denuncian, estaría dificultando a súa actividade política e de fiscalización do Goberno local.
O PSOE considera especialmente relevante que esta sexa a segunda ocasión na que os tribunais fallan ao seu favor neste conflito. A formación lembra que xa en marzo de 2025 obtivera unha resolución favorable nun procedemento anterior e acusa o executivo de Alternativa dos Veciños de ter continuado coa reclamación.
Desde o PSOE cualifican esta actuación como unha estratexia de 'asfixia económica' e consideran que a utilización de recursos públicos para manter litixios contra a oposición supón un gasto que acaba asumindo o conxunto da veciñanza.
Os socialistas tamén aseguran que a nova sentenza confirma que a resolución municipal non podía manterse ao ter sido adoptada dentro dun expediente que xa estaba caducado.