O PSOE de Arteixo demanda unha solución temporal para a circulación de vehículos en Suevos e Rañobre
O grupo municipal do PSOE en Arteixo solicitou ao goberno local que estude unha solución temporal e segura que permita evitar o tránsito de vehículos pesados polas estradas de Suevos e Rañobre mentres se executan as obras de desprazamento do eixo do vial CM-001, aprobadas no pleno de setembro.
O portavoz socialista, Martín Seco, destacou que a veciñanza destas zonas leva tempo esperando unha actuación neste vial, ao cal se lles prometeu unha solución rápida. Con todo, Seco alertou que se están a observar "cambios de criterio" que poderían atrasar as obras e aumentar os problemas de tráfico e perigosidade debido ao paso de vehículos pesados por estas estradas alternativas.
"Temos a sospeita de que a obra se pode alongar no tempo", afirmou Seco, quen subliñou a necesidade de atopar unha alternativa provisional que evite sobrecargar as estradas de Suevos e Rañobre.
Os socialistas piden, polo tanto, que se aceleren as obras do vial e que se estude unha solución temporal para garantir a seguridade viaria mentres duren os traballos.