O PSOE critica as subas nos recibos municipais que afectarán á veciñanza de Arteixo
O grupo municipal socialista de Arteixo anunciou que votará en contra das propostas de incremento de taxas que o goberno local do Partido Popular presentará no pleno deste mes. As subidas afectarán o recibo da recollida de lixo, á subministración de auga, ao IBI industrial e ás tarifas das piscinas municipais, o que o PSOE considera un “sablazo” para a economía da cidadanía de Arteixo.
O portavoz socialista, Martín Seco, indicou que o PP expón un aumento do 28% no recibo de lixo para 2025, debido ao incremento de custos por parte de SOGAMA e á falta de subvencións da Xunta de Galicia. Seco tamén advertiu dunha subida do 5% no recibo da auga, superior ao IPC, e dun incremento no tipo de IBI para as industrias, que pasará do 0,40% ao 0,55%, afectando especialmente os inmobles industriais de maior valor catastral. Ademais, o PSOE denunciou que o prezo das piscinas municipais subirá máis dun 3%.
Seco cuestionou a xestión financeira do Concello, que destinará case un millón de euros para saldar a débeda de Augarsa, deixando o remanente de tesourería practicamente a 0 nun municipio cun orzamento de 70 millóns de euros. “Pedimos ao alcalde Carlos Calvelo que deixe de meter a man no peto da cidadanía e comece a xestionar con planificación e responsabilidade,” concluíu Seco.