O PSdeG pon o foco na depuradora de Curtis-Teixeiro para protexer o Mandeo
O PSdeG de Curtis solicitou a ampliación da depuradora do Polígono Industrial de Curtis-Teixeiro ao considerar que a instalación actual non ten capacidade suficiente para asumir o volume de augas residuais xerado pola actividade empresarial da zona.
O secretario xeral da agrupación local, Fernando Rey Leira, abordou esta situación coa deputada autonómica Silvia Longueira e trasladou a preocupación dos socialistas polo impacto que as deficiencias da infraestrutura poderían ter sobre o río Mandeo e sobre a contorna.
Desde o PSdeG sosteñen que a depuradora, destinada ao tratamento das augas procedentes das empresas do polígono, precisa unha intervención para adaptarse ás necesidades actuais. Rey Leira sinala que, cando a instalación non pode asumir máis residuos, poderían producirse vertidos de auga sen depurar cara ao río.
A agrupación socialista indica que xa se presentou unha denuncia ante o Seprona e reclama á Xunta de Galicia que analice a situación e adopte medidas para corrixir as posibles deficiencias. Entre as actuacións que solicita figuran a ampliación da depuradora e a retirada de plásticos, botellas e outros residuos acumulados na zona do río.
Rey Leira considera necesario actuar con urxencia para garantir un tratamento axeitado das augas residuais do polígono e evitar riscos ambientais. O PSdeG insiste en que a mellora da infraestrutura permitiría dar resposta á actividade actual da área industrial e reforzar a protección do Mandeo.