O Pride Positivo visibiliza na Coruña a loita contra o estigma do VIH cunha xornada de cine, literatura e debate
O Pride Positivo, iniciativa creada en 2022 para poñer o foco na persistencia do estigma e da discriminación asociada ao VIH, celebrará este venres na Coruña unha xornada especial con motivo do Día Mundial da Loita contra a Sida. A cita desenvolverase a partir das 18.00 horas no espazo cultural Galgo Azul, na avenida da Gramela 16, con entrada libre ata completar aforo.
A xornada, organizada por CASCO, combinará proxeccións audiovisuais, literatura e debate. A directora da entidade, Sonia Balvuena, lembra que 'CASCO sempre conmemora o Día Mundial da Sida cunha vertente cultural; outros anos fixemos concertos e nesta ocasión apostamos polo cinema e pola literatura', subliñando o papel da cultura e do deporte no labor da asociación.
O programa abrirase ás 18.00 horas coa proxección de dúas curtametraxes que abordan o VIH desde perspectivas complementarias. Por unha banda, Piruletas, de Carlos Martínez, ofrece unha mirada íntima sobre a aceptación e o respecto ás persoas maiores que viven co virus. A continuación exhibirase Siempre que lo cuento, de Roberto Pérez Toledo, centrada nas emocións e incertezas que xorden cando unha persoa seropositiva decide revelar o seu diagnóstico á parella.
Ás 18.30 horas terá lugar un encontro coa escritora Xulia Alonso, autora do multipremiado Futuro imperfecto, obra na que revisa as décadas dos 80 e 90, anos nos que moitas persoas mozas descubriron ao tempo o amor e a droga, en paralelo á expansión do VIH.
A xornada completaráse cun debate baixo o título 'Estigma, onte, hoxe... nunca máis', previsto para as 19.00 horas. O coloquio estará moderado polo activista Santiago Legaspi Irimia e contará coa participación de Sonia Balvuena, directora de CASCO, e Lidia Coira, traballadora social da entidade. O obxectivo é analizar os retos actuais na loita contra a discriminación e reivindicar a equiparación plena de dereitos das persoas con VIH.
O evento conta coa colaboración do festival de cine Norte Cinema Diverso, Palestra, a Cinemateca Pedro Zerolo, a Fundación Pedro Zerolo, Acción Triángulo, Cesida, o Concello da Coruña e o propio espazo Galgo Azul.